అద‌ర‌గొట్టావ్ చ‌ర‌ణ్‌.. 'పెద్ది' మైండ్‌బ్లోయింగ్ అంతే..: అల్లు అర్జున్

మెగా పవర్ స్టార్ రామ్ చరణ్ హీరోగా వ‌చ్చిన‌ ప్రతిష్ఠాత్మక చిత్రం 'పెద్ది'. ఈ సినిమాను తాజాగా వీక్షించిన ఐకాన్ స్టార్ అల్లు అర్జున్, చిత్ర బృందంపై ప్రశంసల వర్షం కురిపించారు. ముఖ్యంగా రామ్ చరణ్ నటన అద్భుతమంటూ సోషల్ మీడియా వేదికగా తన ఆనందాన్ని పంచుకున్నారు.

"నిన్న రాత్రి 'పెద్ది' చూశాను. నా ప్రియమైన రామ్ చరణ్ నటన మైండ్ బ్లోయింగ్‌గా ఉంది. గ్రిట్టీ, రా పెర్ఫార్మెన్స్‌తో పాటు అసాధారణమైన బాడీ ట్రాన్స్‌ఫర్మేషన్, గ్రేస్‌ఫుల్ డ్యాన్స్ మూవ్స్‌తో ప్రతి అంశంలోనూ అదరగొట్టాడు. నా సోదరుడిని చూసి నిజంగా చాలా గర్వపడుతున్నాను. ఈ ప్రశంసలకు అతను అన్ని విధాలా అర్హుడు" అని అల్లు అర్జున్ తన ట్వీట్‌లో పేర్కొన్నారు.

ఈ చిత్రంలో కీలక పాత్ర పోషించిన జగపతి బాబు నటన అద్భుతమని కొనియాడారు. అలాగే, హీరోయిన్ జాన్వీ కపూర్‌తో పాటు ఇతర నటీనటులు, సాంకేతిక నిపుణులు, నిర్మాతలకు అభినందనలు తెలిపారు.

దర్శకుడు బుచ్చిబాబు సానాపై ప్రత్యేక ప్రశంసలు కురిపించారు. "ప్రతి ఒక్కరి నుంచి అద్భుతమైన నటనను రాబట్టి, చరణ్‌ను అత్యున్నత స్థాయిలో నిలబెట్టిన కెప్టెన్ బుచ్చిబాబు గారికి నా ప్రత్యేక అభినందనలు" అని పేర్కొంటూ 'పెద్ది' చిత్ర బృందం మొత్తానికి శుభాకాంక్షలు తెలియజేశారు. అల్లు అర్జున్ ప్రశంసలతో సినిమాపై అంచనాలు మరింత పెరిగాయి.